ab nahin laut ke aane wala
ghar khula chhod ke jaane wala

ho gain kuchh idhar aisi baaten
ruk gaya roz ka aane wala

aks aaankhon se chura leta hai
ek taswir banane wala

lakh honton pe hansi ho lekin
khush nahin khush nazar aane wala

zad mein tufan ki aaya kaise
pyas sahil pe bujhane wala

rah gaya hai mera saya ban kar
mujh ko khatir mein na lane wala

ban gaya ham-safar aakhir 'nazmi'
rasta kat ke jaane wala