apni chhalakti aankh ke tare gawah hain

apni chhalakti aankh ke tare gawah hain
ashkon mein dube shab ke nazare gawah hain
sukha hai mere jism mein kitna lahu na puchh
haalat ke sulagte sharare gawah hain


hum ne hi ruh phunki thi dasht-e-khayal mein
fitrat ke ye hasin ishaare gawah hain
sote hain meri fikr ke ab tak rawan-dawan
bahr-e-wajud ke ye kinare gawah hain


meri udan taron ke bilkul qarib thi
ilm-o-hunar ke sare ghubbare gawah hain
'jami' ne bhi uruj ke dekhe hain roz-o-shab
azmat ke wo tamam manare gawah hain