badal ke dekh liye zawiye udanon ke
khirad se tai na hue fasle zamanon ke

samundaron ke tamawwuj, nahang, wusaten, khauf
kahan pe hausle tute hain baadbanon ke

falak se roz utarte hain raushni ke khutut
magar na chamke muqaddar gharib-khanon ke

khizan ka zahr sarayat hua hai rag rag mein
gulab-chehre hue zard gulsitanon ke

tulu-e-subh ke aasar ufuq pe hain shayad
charagh bujhne lage hain itab-khanon ke

kiran ka neza liye hath mein chalo 'ashraf'
hain dew raste mein barf ki chatanon ke