bahaaron ka saman hai aur main hun
kisi ka dastan hai aur main hun

kahin jis ka kinara hi nahin hai
wo bahr-e-be-karan hai aur main hun

wo hain aur ek andaz-e-pasheman
wafa ka imtihan hai aur main hun

ata-e-dard-e-ulfat ki badaulat
nishat-e-jawedan hai aur main hun

hui hai pursish-e-haal-e-mohabbat
nigah-e-tarjuman hai aur main hun

tamannaon ki jalti rahguzar mein
khayal-e-karwan hai aur main hun

wahi betab armanon ki duniya
wahi gham ka dhuan hai aur main hun

jahan mein ab ba-nam-e-sher 'azmat'
mera apna jahan hai aur main hun