barbaadiyon ka apni gila kya karenge hum
aaegi un ki yaad to roya karenge hum

hum zindagi se apni bichhad kar bhi ji rahe
kya khak ab qaza ki tamanna karenge hum

sab kuchh unhen diya jo hamein kuchh na de sake
ai hasil-e-khulus bata kya karenge hum

thi jin se kuchh umid-e-wafa wo badal gae
hargiz na ab kisi ki tamanna karenge hum

yaad aa rahi hai aaj bahut un ki naseha
ab ibtida-e-saghar-o-mina karenge hum