be-mehr talluq tha juda hona tha ek din
jo kuchh bhi mere sath hua hona tha ek din

kuchh hum hi farebon mein giraftar rahe the
us ne to bahar-haal juda hona tha ek din

ab itna bhi sangin mera jurm nahin tha
is qaid se aakhir to riha hona tha ek din

yunhi to kabhi harf-e-shikayat nahin nikla
is dard ne aakhir to dawa hona tha ek din

tum shairi karte ho 'yashab' is liye tum ko
ab dard ka tohfa to ata hona tha ek din