bhala kashkol ke aage ye kasa kaun karta hai
ho dil apna to phir duje ki aasha kaun karta hai

yahan hum hain bhare baithe wahan un ko bhi ghussa hai
chalo phir dekhte hain ab tamasha kaun karta hai

tumhaara pyar hai na jo suno ratti barabar hai
ye khud hi dekh lo tole ko masha kaun karta hai

suna hai donon hi ek dusre se pyar karte hain
chalo phir dekhte hain be-tahasha kaun karta hai

ye hum hi the jo sab kuchh bhul kar phir dil laga baithe
bhala socho tamashe par tamasha kaun karta hai

kabhi aankhen kabhi gesu kabhi abru banate ho
'razi' tum jaante ho but tarasha kaun karta hai