bulandiyon ke dhundalke mein tha khuda sa laga
jo main qarib se guzra to wo shanasa laga

na koi jism tha us ka na koi chehra magar
jihat jihat se ubharti hui sada sa laga

aqab mein chhodta aaya shikastagi ka ghubar
ki sang-e-mil bhi mujh ko ek aaina sa laga

bahut nasheb-o-faraaz us ke tai kiye main ne
wo sar se panw talak ek rasta sa laga

yahi kaha tha ki tum sab badalte chehre ho
har ek shakhs mujhe phir khafa khafa sa laga

sada-e-amad-o-shud bais-e-safar thi 'kamal'
nafas nafas mujhe apne lahu ka pyasa laga