chandni raat badi der ke baad aai hai
lab pe ek baat badi der ke baad aai hai

jhum kar aaj ye shab-rang laten bikhra de
dekh barsat badi der ke baad aai hai

dil-e-majruh ki ujdi hui khamoshi se
bu-e-naghmat badi der ke baad aai hai

aaj ki raat wo aae hain badi der ke baad
aaj ki raat badi der ke baad aai hai

aah taskin bhi ab 'saif' shab-e-hijran mein
akasr auqat badi der ke baad aai hai