chhin gai teri tamanna bhi tamannai se
dil bahalte hain kahin hausla-afzai se

kaisa raushan tha tera nind mein duba chehra
jaise ubhra ho kisi khwab ki gahrai se

wahi aashufta-mizaji wahi khushiyan wahi gham
ishq ka kaam liya hum ne shanasai se

na kabhi aankh bhar aai na tera nam liya
bach ke chalte rahe har kucha-e-ruswai se

hijr ke dam se salamat hai tere wasl ki aas
tar-o-taza hai khushi gham ki tawanai se

khil ke murjha bhi gae fasl-e-mulaqat ke phul
hum hi farigh na hue mausam-e-tanhai se