Dar raha hun na KHauf kha raha hun

dar raha hun na khauf kha raha hun
be-sabab baat ko badha raha hun
us ki khushbu pahan raha hun kabhi
kabhi aawaz mein naha raha hun


phul tak us ko de nahin sakta
phir hare bagh kyun dikha raha hun
kar raha hun main baat ek se aur
dusre shakhs ko suna raha hun


be-tahasha dikhai de wo mujhe
har taraf aaine laga raha hun
main bahut khud-pasand hun lekin
us ke kahne pe muskura raha hun


tum kisi daur mein pari rahi ho
aaj bachchon ko sab bata raha hun
kash wo bhi kabhi batae ki main
us ko shiddat se yaad aa raha hun