din kisi surat guzarta hi nahin
ret par chehra ubharta hi nahin

ji rahe hain nafraton ke darmiyan
chehra-e-imkan nikharta hi nahin

ta-abad jari rahe raqs-e-junun
ghar ka sannata bikharta hi nahin

dekhna qaht-e-jamal-e-zindagi
shahr mein koi sanwarta hi nahin

jaane kya us ki nazar ne kar diya
dil kisi pahlu thaharta hi nahin

nashsha-e-hasti ke din pure hue
'saghar'-e-jaan hai ki bharta hi nahin