dosti ki justuju hai shahr mein
hum bhi moti dhundte hain nahr mein

ghaur se dekha to har khurshed chand
tab-e-raushan kitni kam hai dahr mein

jab bhi chaha chal padi mazi ki film
aisi qudrat yaad ki ek lahr mein

jaante hain kuchh hamein insan-zada
farq insan aur khuda ke qahr mein

shiddat-e-ehsas thi inam-e-ishq
shahd ab shirin na talkhi zahr mein

ret par the kis qadar naqsh-e-jamil
ho gae sab jazb chadhti lahr mein