dua hi wajh-e-karamat thodi hoti hai
ghazab ki dhup mein barsat thodi hoti hai

rah-e-wafa ki riwayat hai sar jhuka rakhna
bisat-e-ishq pe ye mat thodi hoti hai

jo apna nam saf-e-mo'tabar mein likhte hain
khud un se apni mulaqat thodi hoti hai

bahut se raaz dilon ke dilon mein rahte hain
use batane ki har baat thodi hoti hai

dil o nazar mein jo bas jae dil-ruba thahre
ki dilrubai koi zat thodi hoti hai

'hijab' ahl-e-junun mein shumar hone ki
asas izzat-e-sadat thodi hoti hai