ek haweli hun us ka dar bhi hun
khud hi aangan khud hi shajar bhi hun

apni masti mein bahta dariya hun
main kinara bhi hun bhanwar bhi hun

aasman aur zamin ki wusat dekh
main idhar bhi hun aur udhar bhi hun

khud hi main khud ko likh raha hun khat
aur main apna nama-bar bhi hun

dastan hun main ek tawil magar
tu jo sun le to mukhtasar bhi hun

ek phaldar ped hun lekin
waqt aane pe be-samar bhi hun