ek lahza na gham-e-sud-o-ziyan hum ne kiya
mausam-e-hijr mein ye kar-e-garan hum ne kiya

ye zamin sakht thi ashab-e-mohabbat ke liye
chashma-e-ashk yahan kaise rawan hum ne kiya

kaisi virani thi hum jis mein khilate rahe phul
kya ayan tha jise har roz nihan hum ne kiya

hum ne jo kuchh bhi kiya gham ke hawale se kiya
yun nahin kar-e-junun rah-guzran hum ne kiya

zindagi teri jabin yunhi chamakti rah jae
us pe ek chand sajaane ka guman hum ne kiya