fasil-e-shahr ko jab tak gira nahin denge
hamein ye log kabhi rasta nahin denge

tamam umr jo chehre ko apne padh na sake
hum un ke hathon mein ab aaina nahin denge

ghutan ho aisi ki tum khul ke sans le na sako
tumhein hum is se ziyaada saza nahin denge

tujhe duboenge khud tere hashiya-bardar
hum apni rah se tujh ko hata nahin denge

ye bazm-e-sher-o-adab kab kisi ki hai miras
jo nasl gungi ho hum jaeza nahin denge

wo jin ke nam se hum zahr pi gae 'nayyar'
hum un ke haq mein kabhi bad-dua nahin denge