gardish-e-dauran ne tanha kar diya
jis ne jab chaha tamasha kar diya

mujh ko pyasa dekhne ke shauq mein
tu ne dil-dariya ko sahra kar diya

main ne jo chaha na waisa ho saka
tu ne jaisa chaha waisa kar diya

ab andheron ka mujhe kuchh dar nahin
tu ne jo dil mein ujala kar diya

jaane kya hota jo phir aata nazar
ek jhalak ne tera shaida kar diya

mutmain 'zaryab' ho jaega jab
waqt ne gham ka mudawa kar diya