gham-e-khashak kya shoale ko hoga
wo raqsan khud hi ek lamhe ko hoga

chatanon ki shikast aasan nahin hai
bil-akhir tutna shishe ko hoga

khayal-e-dushmanan hoga to wo bhi
kisi mujh se hi dil wale ko hoga

ye ghar to ghar jabhi kahlaenge jab
gham-e-ham-saya ham-sae ko hoga

main jab guzrunga is johd-e-safar se
mara pichhla qadam uthne ko hoga

wo shor uthne laga bahar ki ab to
bachana ghar ke sannate ko hoga

zamane ko bhi hum ne kab kiya khush
zamana hum se khush kahe ko hoga