ghus ghusa kar sahi rawan to hai
dil budhape mein bhi jawan to hai

go mazamin nahin hamare pas
shaeri ke liye zaban to hai

raaz to na hua jo batla dun
warna tu achchha raaz-dan to hai

ghusse mein ishq ko kaha gali
aur tu kah rahi hai han to hai

teri taswir khinchne ke baad
camera zeb-e-dastan to hai

aql rahti hai gham jahan sab ki
wo bhi aakhir koi jahan to hai

ho siyasi ya chahe jazbaati
samain ke liye bayan to hai

chhod kar jaane ka ho faeda kya
meri sochon mein karwan to hai

kuchh kharidari ke liye 'muzdam'
khwab mein hai magar dukan to hai