haalat sanwarne mein zara der lagegi
is zakhm ke bharne mein zara der lagegi

thanda nahin ho paya mera khun abhi tak
mujh ko abhi marne mein zara der lagegi

thahro abhi kuchh der meri aankhon ke aage
ausan bikharne mein zara der lagegi

ubhrega ba-har-taur har ek dubne wala
mana ki ubharne mein zara der lagegi

jo azmat-e-insan ko sitaron se mila de
us kaam ke karne mein zara der lagegi