hai yaad josh ye jis waqt ashk-bari thi
to ek nahr usi aastin se jari thi

zamin-e-bagh pe girte hain tut kar tare
sitara-dar qaba us ne kyun utari thi

main aankhen band kiye tha wo dekhte idhar
jise wo samajhte the ghaflat wo hoshiyari thi

lahu ke ashk jo tapke to khul gaya ye raaz
nigah thi dil mein ki utri hui katari thi

mili hai dekhiye ye subh-e-hashr se ja kar
lahad ki raat na thi sham-e-gham hamari thi

nahin hain hum to chamakta hai subah ka tara
ye raat wo thi jo bimar-e-gham pe bhaari thi