hamare sheron mein jo log dhalne lagte hain
hamari zat se kyunkar wo jalne lagte hain

ajib baat hai tum sath chal nahin pate
hamare sath to raste bhi chalne lagte hain

tumhaari aankh kisi aur samt uthne se
hazar khadshe yahan dil mein palne lagte hain

tumhaari izzat-o-takrim ke liye aksar
hum apni zat ka pahlu badalne lagte hain

sitara-war khayalon ke silsile 'zaryab'
guman-o-waham ke sanchon mein dhalne lagte hain