har ek musafir ki aastha ko bacha liya hai
khuda ne tufan se nakhuda ko bacha liya hai

tere akadte hi jhuk ke milne se ruk gaya main
teri ana ne meri ana ko bacha liya hai

mere pukare bina hi tu ne palat ke jaanan
jo dil se nikli thi us sada ko bacha liya hai

palak jhapakte hi us bichaari ka qatl hota
nazar jama kar teri ada ko bacha liya hai

ghazal ne muddat ke baad utar kar 'nabil' teri
bani hui thi jo us hawa ko bacha liya hai