har gali kuche mein rone ki sada meri hai
shahr mein jo bhi hua hai wo khata meri hai

ye jo hai khak ka ek dher badan hai mera
wo jo udti hui phirti hai qaba meri hai

wo jo ek shor sa barpa hai amal hai mera
ye jo tanhai barasti hai saza meri hai

main na chahun to na khil pae kahin ek bhi phul
bagh tera hai magar baad-e-saba meri hai

ek tuti hui kashti sa bana baitha hun
na ye mitti na ye pani na hawa meri hai