hawas-nasib nazar ko kahin qarar nahin main muntazir hun magar tera intizar nahin hamin se rang-e-gulistan hamin se rang-e-bahaar hamin ko nazm-e-gulistan pe ikhtiyar nahin abhi na chhed mohabbat ke git ai mutrib abhi hayat ka mahaul khush-gawar nahin tumhaare ahd-e-wafa ko main ahd kya samjhun mujhe khud apni mohabbat pe e'tibar nahin na jaane kitne gile is mein muztarib hain nadim wo ek dil jo kisi ka gila-guzar nahin gurez ka nahin qail hayat se lekin jo sach kahun ki mujhe maut nagawar nahin ye kis maqam pe pahuncha diya zamane ne ki ab hayat pe tera bhi ikhtiyar nahin