hazar rang jalal-o-jamal ke dekhe
wo marke tere husn-e-khayal ke dekhe

samajh mein aane laga maqsad-e-hayat-o-mamat
wo zawiye tere hijr o visal ke dekhe

har ek gham hai tar-o-taza pahle din ki tarah
amanaten koi yun bhi sambhaal ke dekhe

faza na bujhne lage is khayal se akasr
dil o nigah ke raste ujal ke dekhe

nagar bhi aur khandar bhi nazar mein rahte hain
ajib daur uruj-o-zawal ke dekhe

ki rashk aane laga apni be-kamali par
kamal aise bhi ahl-e-kamal ke dekhe

na chashm ishaare se waqif na lab ka harf se rabt
kuchh aise silsile bhi qil-o-qal ke dekhe

zamin zamin na rahi aur falak falak na raha
kuchh aise marhale bhi arz-e-haal ke dekhe

koi sadi bhi hai pal aur koi pal bhi sadi
kuchh aise fasle bhi mah-o-sal ke dekhe

hui zamin kabhi rakh to kabhi gharqab
kuchh aise hausle bhi barshgal ke dekhe

ajib shart hai in manzaron ki ai 'ruhi'
ki apni aankhen koi khud nikal ke dekhe