hijr-mausam tha satati rahi tanhai hamein
chhat pe tara bhi jo tuta to sada aai hamein

qahqaha-zar fazaon mein ajab bhid si thi
ghar ka mahaul jo dekha to hansi aai hamein

hum sarabon ke musafir the magar jaante the
kis ke dam par na daraati rahi purwai hamein

chhanw ne aabla-pai ke siwa kuchh na diya
dhup deti rahi ehsas-e-tawanai hamein

hum ko to daldali samton ka bhi andaza tha
ret dariya ki bhi malum thi gahrai hamein

'rind' khamosh si yalghaar thi chaurahe par
kanch ke ghar se jo bazar mein le aai hamein