hum jo in hathon ko masruf-e-amal rakhte hain
masale jo bhi hon khud samne hal rakhte hain

apne hisse mein faqat bagh ki mehnat aai
phul rakhte hain na hum pas mein phal rakhte hain

din ko muflis hain to kya raat hai shahon jaisi
hum bhi khwabon mein kai taj-mahal rakhte hain

hum unhen dekh ke jite hain sitam to dekho
jo hamein dekh ke peshani pe bal rakhte hain

hum wahan dars-e-wafa den bhi to kya log jahan
bughz sinon mein dimaghon mein khalal rakhte hain

aap ke sheron mein 'farhat' gham-e-dauran kaisa
ahl-e-fan aap se ummid-e-ghazal rakhte hain