hum ki jo baithe hue hain apne sar pakde hue
aap hi zanjir hain aur aap hi jakde hue

sham pili rakh mein khun-e-shafaq ka injimad
raat jaise khwab-e-yakh-basta hon din akde hue

rang ke pahre hain rukhsaron ki aab-o-tab par
aur rangon ko hain zulfon ki laten jakde hue

dhup ne nakhun duboe hain gulon ke khun mein
zakhm-khurda khushbuen phirti hain sar pakde hue

raat kali raat pedon ko hilati aandhiyan
aur hum baithe tanab-e-khwab hain pakde hue