hum tumhein kah denge kya hai zindagi
khubsurat hadsa hai zindagi

kaenat-e-rang-o-bu mein har taraf
dekhiye jalwa-numa hai zindagi

dard to hai ek kalise ki tarah
aur dilkash rahiba hai zindagi

kuchh masarrat kuchh ghamon ki chhanw mein
tajraba-dar-tajraba hai zindagi

hum tasawwur ke bayabanon mein hain
khushnuma ek daera hai zindagi

yas-o-hasrat ki sulagti bazm mein
aaj bhi naghma-sara hai zindagi

git hai 'jami' tumhaari shaeri
git ki tarz-e-ada hai zindagi