husn maghrur bhi hai mail bhi
ishq sardar bhi hai sail bhi

sarfaroshan-e-shauq-o-masti ko
naghma hai shorish-e-salasil bhi

jazb-e-kaamil jo dastgir hua
to qarib aa gai hai manzil bhi

ek dil hai khulus-e-sar-ta-pa
hai yahi zindagi ka hasil bhi

yahi mushkil to hai mohabbat mein
ki ye aasan bhi hai mushkil bhi

hae us jalwe ki khud-arai
ki hai mastur bhi muqabil bhi

'khalid'-e-zamzama-sara chup hai
aur andohgin hai mahfil bhi