is baat ko bhulen na musalman khuda ke
kafir bhi haqiqat mein hain insan khuda ke

wo kaun hai jis ko nahin kuchh us se shikayat
wo kaun hai jis par nahin ehsan khuda ke

badhta hi chala jata hai duniya mein tassub
bante hi chale jate hain aiwan khuda ke

jalti hain bahar-haal gunahon ki sazaen
karte rahen hum kitne bhi gun-gan khuda ke

duniya to haqiqat mein hai ek rain-basera
hum sab to hain kuchh waqt ke mehman khuda ke

mar kar bhi zaruri nahin paenge rihai
duniya ke alawa bhi hain zindan khuda ke

socho to zara bhi nahin insan ki waqat
sudh-budh bhi khuda ki hai dil-o-jaan khuda ke

'parwaz' kabhi ghaur se ye baat bhi sochen
ek bar bhi kaam aaya hai insan khuda ke