ishq ka eatibar hain hum log
zindagi ka waqar hain hum log

gard-e-lail-o-nahaar hain lekin
ghaza-e-nau-bahaar hain hum log

sar pe bar-e-falak uthae hain
go nahif-o-nazar hain hum log

dushmanon ke liye payam-e-marg
aur yaron ke yar hain hum log

zindagani ganwa na de hum ko
hasil-e-rozgar hain hum log

ek safar tirgi mein jari hai
asp-e-shab par sawar hain hum log

husn ki qadr hai hamein malum
shairon mein shumar hain hum log

aaina dekhna bhi hai mushkil
is qadar sharmsar hain hum log

hum 'munawar' hain pasban gul ke
is gulistan mein khar hain hum log