itna manus hai dil aap ke afsane se
ab kisi taur bahalta nahin bahlane se

jam-o-mina ke tayyun se hai baala saqi
zarf dekha nahin jata kisi paimane se

aao tajdid-e-wafa phir se karen hum warna
baat kuchh aur ulajh jaegi suljhane se

hai samajhna to mohabbat se guzar ai hamdam
baat aaegi samajh mein na yun samjhane se

ab na chahenge kisi aur ko taslim magar
faeda kya hai mere sar ki qasam khane se

main tahi-hosh sahi aap ka irshad baja
aap bekar ulajhne lage diwane se

'arzu' shikwa-ba-lab ho to rahe ho lekin
faeda guzri hui baat ko dohrane se