jab bhi us ki khwahish rakhna
achchha hai kuchh danish rakhna

lakh mana kar dene par bhi
jari apni koshish rakhna

main ne mohabbat sikhlai thi
sikha kis ne ranjish rakhna

dil mandir masjid jaisa hai
dil mein na koi sazish rakhna

khwahish mein sar bhi jate hain
soch samajh kar khwahish rakhna

chahat ka matlab hota hai
dil mein zinda aatish rakhna

hans dene par us ke aage
koi mat farmaish rakhna