jab chaha iqrar kiya hai jab chaha inkar kiya
dekho hum ne khud hi se ye kaisa anokha pyar kiya

aisa anokha aisa tikha jis ko koi sah na sake
hum samjhe patti patti ko hum ne hi sarshaar kiya

rup anokhe mere hain aur rup ye tu ne dekhe hain
main ne chaha kar bhi dikhaya ya jangal gulzar kiya

dard to hota hi rahta hai dard ke din hi pyare hain
jaise tez chhuri ko hum ne rah rah kar phir dhaar kiya

kale chehre kali khushbu sab ko hum ne dekha hai
apni aankhon se un ko sharminda har ek bar kiya

rote dil hanste chehron ko koi bhi na dekh saka
aansu pi lene ka wada han sab ne har bar kiya

kahne jaisi baat nahin hai baat to bilkul sada hai
dil hi par qurban hue aur dil hi ko bimar kiya

shishe tute ya dil tute khushk labon par maut liye
jo koi bhi kar na saka wo hum ne aakhir-kar kiya

'naz' tere zakhmi hathon ne jo bhi kiya achchha hi kiya
tu ne sab ki mang sajai har ek ka singar kiya