jalwa-e-mehr-o-mah kya sham-o-sahar mein kuchh nahin
ab teri yaad ke siwa meri nazar mein kuchh nahin

pahli nigah ishq ki karni hai sehr-e-husn par
ek hi bar dekhiye bar-e-digar mein kuchh nahin

ab main hun us maqam par ranj-o-khushi jahan hain ek
sham-e-alam ka zikr kya nur-e-sahar mein kuchh nahin

tu hi nahin jo ham-kanar phul kahan kahan bahaar
ab ye jahan-e-lala-zar meri nazar mein kuchh nahin

ye tera husn-e-arzi ye teri shan-e-be-rukhi
teri nazar mein kuchh sahi meri nazar mein kuchh nahin