jalwa-e-sham hai ye subh ka manzar to nahin
chand kaisa bhi ho suraj ke barabar to nahin

qaht-e-shamshad-e-qadan wajh-e-sar-afraazi hai
warna sarkar kuchh aise bhi qad-awar to nahin

ism-e-azam koi phunke to ye jadu tute
but bane sehr se ham-sang ke paikar to nahin

kaam aaegi sarw-o-sang ki nisbat warna
dar-numa naqsh hain diwar pe ye dar to nahin

jazba-e-shauqat-e-tamir bana marqad-e-shauq
is nae shahr ke ye taj-mahal ghar to nahin