jazba-e-shauq ka izhaar karun ya na karun
dil ko ruswa sar-e-bazar karun ya na karun

dard khud badh ke hua jata hai darman dil ka
ab ilaj-e-dil-e-bimar karun ya na karun

qais-o-mansur ki taqlid se dam ghutta hai
ehtimam-e-rasan-o-dar karun ya na karun

jis ko khuddari-e-jazbaat ka ehsas na ho
nazr us ko dil-e-khuddar karun ya na karun

us ki ruswai ka bais na hon meri ghazlen
nazr-e-ahbab ye shahkar karun ya na karun

le na angdai kahin gardish-e-ayyam 'umar'
husn-e-khwabida ko bedar karun ya na karun