ji kar kabhi mare kabhi mar kar jiya kiye
kya kahiye hijr-e-yar mein kya kya kiya kiye

baitha hun phir tasawwur-e-zulf-e-duta kiye
dil ko asir-e-halqa-e-dam-e-bala kiye

main kya hun meri koshish-e-nakaam kya mila
bigde hue tere hi karam se bana kiye

wo rah tere wahshi ne tai kar liye tamam
jin mein janab-e-khizr bhatakte phira kiye

us ne meri ummid ke daman ko bhar diya
main ne kabhi daraaz jo dast-e-dua kiye

allah re khud-numai-e-husn-e-fareb-kar
aaina dekh dekh wo hairan hua kiye

tirchhi nazar ko phir bhi raha pas-e-ehtiyat
tiron ne par nishane na hargiz khata kiye

kashti ko 'nur' bahr-e-hawadis mein dal kar
baitha hai na-khuda bhi supurd-e-khuda kiye