jis ko jitna hosh hai itna hi wo diwana hai
kya kahen diwana-pan hi hosh ka paimana hai

jis ke dil mein imtiyaz-e-kaba-o-but-khana hai
manzilon dur us se rah-e-manzil-e-jaanana hai

dahr mein laila-e-azadi ka jo diwana hai
us ka har naqsh-e-qadam mere liye but-khana hai

is jahan ki baat ho ya us jahan ki baat ho
ye bhi qissa hai tera wo bhi tera afsana hai

is ko daulat ka nasha hai us ko izzat ka khumar
har koi madhosh hai duniya bhi kya mai-khana hai

chashm-e-haq-bin kah rahi hai ye zaban-e-haal se
khwab hai duniya kisi ka ya koi afsana hai

zarra zarra mein nazar aata hai jis ko husn-e-dost
wo jahan mein be-niyaz-e-kaba-o-but-khana hai

jis mein jitni hai sharafat us qadar jhukta hai wo
inkisari dar-haqiqat zarf ka paimana hai

dil sahi lekin wo dil koi dilon mein dil nahin
dard se na-ashna ulfat se jo begana hai

be-sabaati-e-jahan par kaun karta hai yaqin
hum samajh kar bhi na ye samjhe ki ye afsana hai

aa rahi hain dil se ghafil ye sadaen dam-ba-dam
daulat-e-duniya ke pichhe kis liye diwana hai

aabru jae watan ki aur tum dekha karo
kya yahi ai nau-jawano himmat-e-mardana hai

jis ka mazhab ban gaya ho khidmat-e-khalq-e-khuda
us ko 'sufi' is se kya ye khwesh ye begana hai

kaif tari hai dimagh-o-dil pe us ke kis qadar
jam-o-hiddat pi ke 'sufi' kis qadar mastana hai