jo dekhe the wo sare khwab rukhsat ho gae hain
hamare sab adab aadab rukhsat ho gae hain

ye duniya jis gharane ke sabab tu ne banai
teri duniya se wo be-ab rukhsat ho gae hain

nigahban the jo sahil par hamari kashtiyon ke
wo sab ke sab sar-e-girdab rukhsat ho gae hain

pada hai jab qabile par hamare waqt koi
hamare mo'atabar ahbab rukhsat ho gae hain

tulu-e-subh ki afwah par mahfil se us ki
hazaron anjum-o-mahtab rukhsat ho gae hain