jo nahin jaanta hun khalq-e-khuda puchhti hai
mujh se har mod pe ab mera pata puchhti hai

be-aman dekh ke tute hue patton ki tarah
le chalun tujh ko kidhar mujh se hawa puchhti hai

mujh mein wo kaun si shai hai jo har ek pal mujh se
hona kab qaid-e-badan se hai riha puchhti hai

dekh kar jis ko sabhi log hain ghabrae hue
khairiyat meri wahi rah-e-fana puchhti hai

muntazir kab se meri tishna-labi thi jis ki
wo ghata mujh se samundar ka pata puchhti hai

zarre zarre ki zaban par hai kahani meri
mujh se ye duniya mere bare mein kya puchhti hai

dasht-e-zulmat hai mujhe shahr-e-nigaran 'naushad'
haal-e-dil mujh se sitaron ki ziya puchhti hai