juz nadamat malal kya hoga
hasil-e-ishti'al kya hoga

main ki khana-ba-dosh hun mujh ko
hijraton ka malal kya hoga

khamushi jab kalam karti ho
phir wahan qil-o-qal kya hoga

ek muddat se hijr lahaq hai
koi mujh sa nidhaal kya hoga

jis pe wada hai rab ki bakhshish ka
qatra-e-infi'al kya hoga

zid pe aae hue hain ashk mere
zabt ab tera haal kya hoga

dost tarkash-ba-dosh hain 'shazi'
zakhm ka indimal kya hoga