kab bujhti hai suraj ki ziya sham se pahle jalta hai kahan koi diya sham se pahle israf ise kahiye ki danista taghaful kyon qumquma sadkon pe jala sham se pahle is shahr-e-pur-ashob ki hai raat bhayanak ghar laut ke aana hai zara sham se pahle ye zulmat-e-shab tabish-e-anjum ke liye hai ye raaz-e-nihan hum pe khula sham se pahle ummid hai aaram se ye raat kategi taskin ki mangi hai dua sham se pahle sahra mein ghanimat hai kadi dhup ka saya deta hai jo manzil ka pata sham se pahle hoti hai 'jamil' aisi kashish rishta-e-jaan mein laut aate hain arbab-e-wafa sham se pahle