kahin sar patakte diwane kahin par jhulaste parwane
jo ho be-shuur kya jaane ye hain zindagi ke afsane

ye nai nai har ek surat ye tilismi aaina-khane
hai ghazab ki shoala-samani ki bhatak rahe hain parwane

sabhi apne aur begane chale aa rahe hain samjhane
mujhe kya hua khuda jaane main sidi hun ya ye diwane

koi aa raha hai samjhane magar is tarah ki be-jaane
hain usi ke gham mein diwane abhi sun le to bura mane

lalak ek si na ai koyal na tera sa dil hai mera dil
teri kuk ko main kya samjhun meri huk ko tu kya jaane

teri be-rukhi ne ai saqi hawas-e-talab badha di hai
hua chur ek paimana to bane hazar paimane

hai idhar khumar aaankhon mein udhar intizar aaankhon mein
abhi daur-e-mai-kashi hai dur abhi ban rahe hain maikhane

hua bhole-pan pe jo bismil wo to apna aap hai qatil
ye samajh ka pher hai ai dil sitam-o-jafa wo kya jaane

nai karwaten zamane ki hain badi hi inqalabaati
kahin bastiyon mein virani kahin bas rahe hain virane

ye ubharti mitti tahriren ye bigadti banti taswiren
kisi husn ki hain tanwiren koi dekhe ho to pahchane

tu hai jaan-e-husn ye sun ke to pasina chhuta mathe se
mera nam 'arzu' sun le to wo aur bhi bura mane