kaisa makan saya-e-diwar bhi nahin
jite hain zindagi se magar pyar bhi nahin

uthti nahin hai hum pe koi mehrban nigah
kahne ko shahr mahfil-e-aghyar bhi nahin

ruk ruk ke chal rahe hain ki manzil nahin koi
har kucha warna kucha-e-dildar bhi nahin

guzri hai yun to dasht mein tanhaiyon ke umr
dil be-niyaz-e-kucha-o-bazar bhi nahin

aage badhaiye to qadam aap 'jafari'
duniya ab aisi wadi-e-pur-khar bhi nahin