kuchh aql bhi rakhta hai junun-zad hamara
ab ishq mein pagal nahin farhad hamara

khemon se ubharne lagin matam ki sadaen
aur hum se khafa ho gaya sajjad hamara

ek phul ke khilne se bahut pahle jahan mein
ek khwab hua jata hai barbaad hamara

ek soch ki mahdud hi rahti hai rahegi
ek dil ka parinda hai ki aazad hamara

ye bazm-e-sukhan saz-e-sukhan hi ki tag-o-taz
sunta hai yahan har koi irshad hamara

ye talkhi-e-qismat hai ki sanson ki ata hai
aahon se bhare daman-e-fariyaad hamara

hum qafiya-paima nahin shair hue 'hassan'
aur mir-taqi-'mir' hai ustad hamara