kuchh harj nahin jam jo begana lage hai
rindon se khafa saqi-e-mai-khana lage hai

us sham ki tauqir ko aashiq se hi puchho
ye husn use subh-e-sanam-khana lage hai

dekhe hai rukh-e-jaanan pe jab zulf-e-pareshan
is daur ka farzana bhi diwana lage hai

ek main hi nahin lagta tere pyar ka mara
har shakhs tere pyar ka diwana lage hai

dekha hai mujhe jab bhi kaha ahl-e-khirad ne
dil mera kisi shama ka parwana lage hai

mahfil se mere zikr pe chal dete hain uth kar
ye tarz-e-amal un ka raqibana lage hai

is husn ki mahfil ke har andaz se yaro
'adil' hi hamein bani-e-afsana lage hai